Ekki hægt að greiða með greiðslukortum í tvo klukkutíma

Bilun kom upp í greiðslumiðlunarkerfi landsins sem olli því að ekki var hægt að greiða með greiðslukortum í verslunum og þjónustustöðum milli klukkan eitt og þrjú í nótt.

Bilunin kom upp í kerfinu í framhaldi af því rafmagn var tekið af hluta Reykjavíkur. Friðrik Þór Snorrason, forstjóri Reiknistofu bankanna (RB), segir að þau hafi ekki vitað af því fyrirfram að rafmagnið yrði tekið af. Ef svo hefði verið hefðu viðbrögð Reiknistofu verið allt önnur og áhrifin hefðu orðið minni.

Þetta hafi þó verið á þeim tíma sem greiðslumiðlar eru ekki mikið notaðir. Að því leytinu til hafi áhrifin ekki verið mikil út á við en mikil vinna hafi farið af stað innan húss.

„Við kölluðum á þá sem við töldum að þyrftu að vera til staðar og unnið var að því að koma kerfinu á réttan kjöl áður en fólk vaknaði og bankar opnuðu,“ segir Friðrik Þór.

Starfsmenn RB og Orkuveitu Reykjavíkur funduðu í morgun í því skyni að greina vandann. „Við erum að skoða þetta mál í sameiningu til þess að koma í veg fyrir að svona lagað gerist aftur,“ segir Friðrik Þór.

Friðrik segir að RB sé með tvöfalt kerfi sem eigi í langflestum tilfellum að koma í veg fyrir að svona lagað geti gerst og bilun sem þessi hafi ekki komið upp áður.