Mannfall við sendiráð Írana í Beirút

22 eru látnir hið minnsta eftir röð sprenginga við íranska sendiráð í Beirút, höfuðborg Líbanon í morgun. Íran er stór stuðningsaðili Hezbollah samtakanna í Líbanon, sem hafa sent hermenn til bardaga í Sýrlandi, til stuðnings stjórnarhers Bashar al-Assads forseta.

Átökin í Sýrlandi hafa kynnt undir ófriðarbáli trúarhópa í Líbanon. Suðurhluti Beirút, þar sem sendiráð Írans er staðsett, er á miðju áhrifasvæði Hezbollah. Svo virðist sem aðalhlið sendiráðsins hafi verið sprengt í loft upp og töluverðar skemmdir eru á byggingunni að því er fram kemur á fréttavef BBC.

Svo virðist sem um tvær sprengingar hafi verið að ræða, fyrst hafi maður sprengt sig í loft upp og skömmu síðar hafi mun öflugri bílsprengja sprungið.