Svanur blæs til tónleika samhliða landsleik

„Við vorum löngu búin að skipuleggja að hafa tónleikana þennan dag,“ segir Jón Ingvar Bragason, formaður lúðrasveitarinnar Svansins um það að sveitin haldi tónleika á sama tíma og landsleikur Íslands við Króatíu fer fram í Zagreb í kvöld.

Tónleikarnir byrja klukkan 20 og eru haldnir í Norðurljósasalnum í Hörpu en landsleikurinn hefst klukkan 19:15. Svanurinn mun spila tölvuleikjatónlist og varpa upp myndum af tölvuleikjunum á skjá í salnum.

Jón Ingvar segir að til greina komi að fara yfir stöðuna í fótboltaleiknum í hléi. Þau ætli að skoða hvort þau geti varpað leiknum upp á skjáinn sem þau nota á tónleikunum.

„Annars eru nú flestir með síma og geta fylgst með stöðunni þar ef þeim þykir það nauðsynlegt,“ segir Jón Ingvar.

Honum er sjálfum alveg sama þó hann missi af leiknum enda horfir hann ekki á fótbolta né fylgist með öðrum íþróttum. Hann segir suma hljóðfæraleikarana hafa orðið nokkuð svekkta þegar þessi staða kom upp. Það hafi þó ekki verið neinar háværar raddir og þau urðu sammála um að láta bara slag standa.

„Það virðist ekki koma að sök þó þetta sé á sama tíma, miðasalan hefur gengið mjög vel og það eru aðeins örfáir miðar eftir,“ segir Jón Ingvar.