Tæplega þrettán þúsund í Háskóla Íslands

Tæplega þrettán þúsund höfðu greitt skrásetningargjald í Háskóla Íslands þann 23. ágúst síðastliðinn. Það er svipaður fjöldi og fyrir tveimur árum, en þá var fjöldi nemenda í sögulegu hámarki.

Þá má búast við að fjöldi nýskráðra aukist enn frekar á næstu dögum en nemendur hafa frest til 10. september næstkomandi til að endurskoða skráningu sína.

„Þetta er mjög svipuð skráning og við sáum árið 2011,“ segir Jón Atli Benediktsson, aðstoðarrektor vísinda og kennslu hjá Háskóla Íslands.

Stærstu deildir háskólans eru sem fyrr lögfræði, viðskiptafræði og sálfræði. Viðskiptafræðin er þó fjölmennust.

„En það hefur orðið veruleg fjölgun í tölvunar- og verkfræði,“ segir Jón Atli. Alls hafa 196 nýnemar staðfest skólavist í tölvunarfræði í haust og hefur fjöldi nýnema þrefaldast á fjórum árum. Í hugbúnaðarverkfræði hafa 68 nýnemar staðfest skólavist og er þar um nær fjórföldun nemenda að ræða.

Eins stefnir í að nýnemum í mannfræði fjölgi um 30% milli ára og verða þeir nærri 100 á komandi skólaári.

Spurður hvað skýri þessa miklu fjölgun í tölvunar- og verkfræðina svarar Jón Atli því til að nemendur sjái einfaldlega tækifæri í þessu námi. „Svo eru auðvitað gæði námsins mikil,“ bætir Jón Atli við.

Þá vekur athygli að töluverð fjölgun er í starfs- og viðbótarnámi við háskólann, en um 590 hefja nám þar í haust samanborið við tæplega 500 í fyrrahaust.

Jón Atli segir skýringuna á þessari aukningu meðal annars að þarna séu komnar nýjar greinar, meðal annars styttra nám, sem fólk sjái tækifæri í og séu hagnýt. „Annars hefur framhaldsnám aukist verulega,“ bætir Jón Atli við en heildarfjöldi framhaldsnema við Háskóla Íslands verður vel á fjórða þúsund, sem er svipað og á síðasta ári.

Tæplega þrjú þúsund og fimm hundruð nýnemar munu hefja nám við háskólann næsta haust sé tekið mið af upplýsingum frá Háskóla Íslands, en þar er miðað við skráningu nemanda í skólann 23. ágúst síðastliðinn.