Illugi fundaði með Skóla- og frístundaráði

Skóla- og frístundaráð Reykjavíkur fundaði í gær með Illuga Gunnarssyni, menntamálaráðherra, meðal annars um niðurstöður nýrrar PISA-könnunar og læsi barna og ungmenna á báðum skólastigum.

Bæði Illugi og formaður skóla- og frístundaráðs, Oddný Sturludóttir, lýstu yfir ánægju sinni með fundinn og var samstaða meðal fundarmanna um að boða árlega til slíks fundar.

Oddný segir að þrátt fyrir neikvæða umræðu í kringum niðurstöður Pisa könnunarinnar þá sé ánægjulegt að líta til þess að niðurstöður um skólabrag sýna að líðan nemenda komi mjög vel út og segir það einsdæmi að ráðherra komi á fund í skólaráði og því sé um mikilvægt tækifæri að ræða.

„Það er of algengt að við festum okkur í ákveðnum hólfum. Þarna mættu saman sjö áheyrnarfulltrúar, meðal annars skólastjórar, leikskólastjórar og frístundastjórar. Þegar svona stór hópur mætir saman þá er til mikils að vinna,“ segir Oddný.