Stórtónleikar í kvöld: Takmörkuð umferð og hugsanlega rigning

Stórtónleikar hljómsveitarinnar Of Monsters and Men fara fram á túninu við Vífilsstaði í kvöld. Það er ókeypis á tónleikana sem verða úti, og spáin er þokkaleg, þó gestir megi búast við smá rigningu seint í kvöld samkvæmt veðurspá.

Dagskráin er ekki af verri endanum en hér má sjá hana:

Uppfært 14:00: Ahugið að dagskráin hefst klukkan sex, en ekki klukkan fimm. Þetta kom fram á facebook-síðu hljómsveitarinnar skömmu eftir hádegi.

Dagskrá:

17:00   Túnið opnar

18:00   Hide Your Kids

18:30   Moses Hightower

19:30   Mugison

20:40   Of Monsters and Men

22:00   Lok.

Mikilvægt er að halda því til haga að umferð í kringum tónleikasvæðið verður bönnuð.

Aðalbílastæði tónleikanna verður á Kauptúnssvæðinu í Garðabæ þar sem meðal annars IKEA er til húsa. Frá Kauptúnssvæðinu býður Garðabær upp á fríar ferðir með Strætó til og frá Vífilsstaðatúni. Strætóferðin tekur um 5 mínútur á tónleikasvæðið.  

Frá skiptistöð Strætó í Mjóddinni býður Garðabær einnig upp á fríar ferðir með Strætó til og frá Vífilsstaðatúni. Strætóferðin tekur um 10 mínútur.

Frá Ásgarði og um Bæjarbraut býður Garðabær upp á FRÍAR ferðir með Strætó til og frá Vífilsstaðatúni.  Einnig verður boðið upp á strætó frá Álftanesi (Breiðumýri) á klukkustunda fresti, farið á heila tímanum frá Álftanesi og á hálfa tímanum tilbaka.

Tónleikagestir hafa einnig aðgang að bílastæðum í Molduhrauni í Garðabæ, þar sem meðal annars Marel er til húsa.  Ekki verða ferðir með Strætó þaðan og fólki bent á að fara gönguleiðina yfir hraunið og undir Reykjanesbrautina að Vífilsstaðatúni.

Allar strætóferðir hefjast kl. 17:00 og standa yfir allan tímann sem dagskrá er í gangi og eftir tónleika.

Garðbæingar eru sérstaklega hvattir til að nýta sér gönguleiðirnar úr Garðabæ yfir á Vífilsstaðatún. Bílastæði fyrir fatlaða verða við Vífilsstaði.

Engin almenn bílaumferð verður leyfð í kringum Vífilsstaði.

Stjarnan, Ungmennafélag Álftaness, Skátafélagið Vífill og Skátafélagið Svanir verð með sölutjöld á staðnum.  Einnig verða seldir sérhannaðir bolir til styrktar Barnaspítala Hringsins á staðnum.

Hjálparsveit skáta í Garðabæ sér um gæslu á staðnum.

Athugið að samkvæmt upplýsingum frá Vegagerðinni verður Reykjanesbraut lokuð við Kauptún á milli kl. 19.00 til kl. 23.00 á meðan tónleikarnir fara fram.

Hér má finna upplýsingar um umferð og strætó sem og hér.