Einar Kárason setur Arion banka í siðferðisklemmu

Einar Kárason hefur gert Arion banka tilboð.

Rithöfundurinn segir á Facebook-síðu sinni að hann þurfi að greiða Arion banka peninga mánaðarlega, vegna lána, vísakorts og fleira.

Einu sinni á ári, í desember, eigi Arion banki samkvæmt samningi að greiða Einari eitthvað, það er endurgreiðslu (5 krónur af hverjum 1.000 krónum) af verslun við tiltekna aðila.

Í stað þessa að millifæra þessa fjárhæð á Einar býður bankinn honum að láta þessar krónur renna heldur til Mæðrastyrksnefndar.

Einar hefur því gert bankanum tilboð sem hann telur sanngjarnt.

„Hann [bankinn] borgar mér ekki það sem hann á að greiða nú í des heldur lætur það renna til mæðrastyrksnefndar. Á móti því borga ég honum ekki það sem ég á að greiða um mánaðarmótin heldur læt þá upphæð heldur til mæðrastyrksnefndar.

Hafni bankinn þessari fullkomlega sjálfsögðu tillögu er hann augljóslega kominn í alvarlega siðferðisklemmu, treystir sér ekki til að sýna það örlæti sem hann ætlast til af öðrum,“ segir Einar.

Einar segist að lokum ætla að leyfa fólki að fylgjast með framvindunni.