Leiðindaskjóða býðst til að geyma leiðindi fyrir fólk

Jólabærinn á Ingólfstorgi var opnaður í dag. Dagur B. Eggertsson, formaður borgarráðs, opnaði bæinn með formlegum hætti og Tröllakórinn söng nokkur þekkt jólalög. Í fréttatilkynningu segir að athöfnin hafi verið hátíðleg.

Leiðindaskjóða, sem er nýjasti jólavætturinn og sú ellefta í röðinni, mætti með leiðindaskjóðuna sína og bauð öllum að geyma hjá sér hvers kyns leiðindi, í það minnsta fram yfir jól. Vættinum var vel tekið af jólabæjargestum.

Í jólabænum er boðið upp á ýmsar vörur til sölu. Mikið er um handunna íslenska vöru og matvöru beint frá býli.

Bærinn verður opinn alla laugardaga og sunnudaga fram að jólum, frá klukkan 12 til 18.