Sjónræn tónlistarhátíð í fyrsta sinn

„Þetta er í fyrsta skiptið sem hátíðin er haldin hér á landi og við stefnum á að þetta verði stærsti viðburður í sögu sjónrænnar tónlistar og abstrakt kvikmynda hér á landi og þó víðar væri leitað,“ segir Curver Thoroddsen, kynningarstjóri hátíðarinnar, Reykjavík Visual Music Festival.

Skilgreining á hugtakinu, sjónræn tónlist á aldarafmæli og að því tilefni var stofnuð Miðstöð sjónrænnar tónlistar en hun stendur fyrir hátíðinni. „Sjónræn tónlist er í raun nokkurs konar samblanda tónlistar, myndlistar, hreyfimynda og grafískrar hönnunar. Hugtakið hefur ekki verið mjög þekkt hér á landi en er að sækja í sig veðrið,“ útskýrir Curver.

Um er að ræða mikið sjónarspil fyrir áhorfandann, þar sem sem tónlist og myndlist eða hreyfimynd, mynda sameiginlega heild.

Meðal dagskrárliða á hátíðinni eru sjónrænir tónleikar með heimsþekktum listamönnum á borð við Ryoji Ikeda sem er mjög stórt nafn í allri raftónlist, tilraunatónlist og myndlistarheiminum og Ryoichi Kurokawa. Á opnunartónleikum hátíðarinnar verða nokkur verk frumflutt sem sérstaklega voru samin fyrir hátíðina.

„Það er mikill fengur að fá hingað til lands listamenn á borð við Ryoji Ikeda og Ryoichi Kurokawa. Samstarf íslenskra og erlendra listamanna verður einnig í hávegum haft. Anna Þorvalds og Sigurður Guðjónsson vinna saman að verki og Hugi Guðmundsson vinnur með Bret Battey,“ bætir Curver við.

Hátíðin, sem fram fer í Hörpu 30. janúar til 2. febrúar, er samstarfsverkefni Reykjavík Center for Visual Music og Punto y Raya, sem er abstrakt kvikmyndahátíð á Spáni, sem nú verður haldin í fimmta sinn.

„Miðstöð sjónrænnar tónlistar bauð Punto y Raya að halda hátíðina sína á sama tíma hér á landi,“ segir Íris Stefánsdóttir, framkvæmdarstýra hátíðarinnar. Þá er hún einnig haldin að hluta til í samstarfi við Myrka músíkdaga.

Samhliða atburðunum í Hörpu opnar sýningin Hljómfall litar og línu í Listasafni Reykjavíkur og 2014 Punto y Raya akademían mun bjóða upp á vinnustofur fyrir nemendur, þar sem virtir fagmenn á sviði hreyfimynda og sjónrænnar tónlistar kenna.

Miðasala á hátíðina fer fram á harpa.is, bæði er hægt að kaupa miða á alla hátíðina og á staka atburði. Nánari upplýsingar má finna hér.

Reykjavík Visual Music · Punto y Raya Festival 2014 | Teaser from Punto y Raya Festival - dot&line on Vimeo.