Atvinnurekendur þverari fyrir en nokkru sinni áður

Formaður Starfsgreinasambandsins segir jákvætt að ríkisstjórnin hafi verið hrakin til baka með fyrirætlanir hennar um að greiða ekki desemberuppbót til atvinnulausra og legjugjöld á sjúkrahúsum, en meira þurfi til að liðka fyrir kjarasamningum.

Forystufólk verkalýðshreyfingarinnar hefur sagt að stjórnvöld þurfi að koma að borðinu ef takast eigi að gera kjarasamninga til langs tíma. En undanfarna mánuði hefur verið reynt að koma saman skamtímasamningi til eins árs með það fyrir augum að hefja nú þegar undirbúning langtímasamninga. Upp úr þeim viðræðum hefur nú slitnað.

Björn Snæbjörnsson formaður Starfsgreinasambandsins segir jákvætt að ákveðið hafi verið að greiða atvinnulausum desemberuppbót þótt það eitt og sér stuðli ekki að gerð kjarasamninga.

„Mér finnst þessi umræða um það hvort atvinnulausir ættu að fá desemberuppbót eða ekki vera út í hött. Auðvitað hefðu stjórnvöld átt að koma með þetta strax. Þetta er bara sjálfsagt mál. En ég sé ekki að þetta smyrji eitthvað sérstaklega málefnin til að samningar takist,“ segir Björn.

Talsmenn verkalýðshreyfingarinnar lögðust líka mjög hart gegn innheimtu legugjalda á sjúkrahúsum og sögðu þau koma verst við þá sem lægst hefðu launin, þegar síst skyldi.

„Þannig að þetta er auðvitað jákvætt skref. En svo getum við deilt um það hvort menn hefðu  í upphafi átt að reyna að sækja peninga til þeirra sem minna hafa. Það er það sem mér finnst að ríkisstjórnin hafi reynt að gera og fínt að það er búið að hrekja hana til baka með þetta,“ segir Björn.

Þrátt fyrir þetta er Björn hins vegar ekki bjartsýnn á gerð kjarasamninga á næstunni, en Starfsgreinasambandið, Flóabandalagið, Verslunarmannafélag Reykjavíkur og Landssamband verslunarmanna slitu viðræðum við Samtök atvinnulífsins á mánudag. Hann telur ekki líklegt að samið verði fyrir áramót.

„Nei, því miður. Ég held að ég hafi ekki kynnst  annarri eins stífni af hálfu atvinnurekenda áður á mínum ferli. Mér finnst þeir vera þverari en þeir hafa nokkru sinni verið,“ segir Björn Snæbjörnsson formaður Starfsgreinasambandsins.