Útlit fyrir góða berjasprettu fyrir vestan

Óþarfi er að hafa áhyggjur af berjahallæri í sumar, að minnsta kosti á Vestfjörðum, ef marka má Olgeir Hávarðarson sem er þegar byrjaður að týna krækiber og búa til saft. Að hans sögn er útlit fyrir góða berjasprettu en berin koma seint þetta árið.

Olgeir og kona hans búa til allt að hundrað lítra af berjasaft á ári og drekka á hverjum morgni á meðan birgðir endast. Hann þarf þó enn sem komið er að hafa fyrir berjatínslunni þar sem að ekki öll berin eru fullþroskuð.

Það er þó ekki langt í að berin verði fullþroskuð og á það sama við um bláber.