Við erum allir synir

„Við erum báðir búnir að vinna lengi í tískubransanum og kynntumst þegar við vorum báðir að vinna hjá NTC. Við höfðum talað um það í einhvern tíma að stofna okkar eigið merki saman því við höfðum svipaðar hugmyndir um hvað vantaði á markaðinn og hvað væri skemmtilegt að gera. Við ákváðum því fyrr í ár að slá til og stofna Sons.is,“ segir Oddur Sturluson. Hann stofnaði vefverslunina Sons.is ásamt vini sínum Ólafi Fannari Heimissyni en vefurinn var opnuð í síðustu viku.

„Við seljum okkar eigið merki sem fæst ekki neins staðar annars staðar. Framleiðandi í Bandaríkjunum hannar vörurnar fyrir okkur og við veljum útlitið í samráði við hann. Viðtökurnar hafa verið mjög jákvæðar og allir sem hafa fengið og séð vörurnar eru mjög ánægðir,“ bætir Oddur við. Nafnið á versluninni vísar til þess sem allir karlmenn eiga sameiginlegt.

„Nafnið spratt upp úr samtali sem við áttum um handa hverjum merkið væri. Þá byrjuðum við að tala um þá staðreynd að allir karlmenn eiga fyrirmyndir sem þeir líta upp til og vilja líkjast. Við erum allir synir.“

Þeir Oddur og Ólafur eru mjög liðlegir þegar kemur að því að panta af síðunni og vilja allt fyrir viðskiptavini sína gera.

„Við erum í því að redda málunum og bjóða upp á sem besta þjónustu. Viðskiptavinir panta vöru á vefsíðunni og fá hana senda daginn eftir. Ef einhver er hins vegar óviss um einhverja vöru eða vill fá hana fyrr er lítið mál að senda okkur skilaboð og við reddum því.“

Vinirnir hafa í hyggju að breikka vöruúrvalið en sem stendur selja þeir bindi, slaufur og vasaklúta. En er ekkert erfitt að vinna með vini sínum?

„Satt best að segja er rosalega þægilegt að vinna með honum Óla. Við erum svo góðir vinir að það er lítið mál að ræða saman og komast að niðurstöðu ef við erum ósammála.“