KSÍ mun skoða hegðun Silfurskeiðarinnar

Stuðningsmannasveit Stjörnunnar, Silfurskeiðin, varð uppvís að afar vafasamri hegðun á KR-vellinum í gær á leik KR og Stjörnunnar í 1. umferð Pepsi-deildar karla. Sveitin söng þá ljótan níðsöng um Bjarna Guðjónsson, fyrirliða KR, og það sem meira er þá er þetta annað árið í röð sem sveitin gerir það.

Svo allir stuðningsmenn væru með það á hreinu hvernig níðsöngurinn væri setti Silfurskeiðin textann inn á Twitter-síðu sína í fyrra.

Söngvar sveitarinnar féllu ekki vel í kramið hjá áhorfendum á KR-vellinum í gær en þetta er ekki í fyrsta skiptið sem þessi stuðningsmannasveit þykir fara langt yfir strikið með söngvum sínum.

Framganga stuðningsmannahópsins á Twitter hefur einnig vakið athygli en framkoma þeirra þar ber ekki vott um íþróttamannslega framkomu né virðingu fyrir mótherjum og öðrum er að leiknum koma. Lesa má nokkrar valdar Twitter-færslur hér að neðan.

Mörgum Twitter-notendum ofbauð framkoma stuðningsmannanna á KR-vellinum í gær en Silfurskeiðarmenn sáu ekki eftir neinu. Sögðu að þetta væri hluti af leiknum.

Þórir Hákonarson, framkvæmdastjóri KSÍ, hafði heyrt af málinu og honum var ekki skemmt.

"Ég hef heyrt af þessu máli og ég mun kanna hvernig þetta fór fram. Mér finnst það ekki vera sæmandi áhorfendum að vera með slíkan dónaskap ef þetta fór fram eins og menn segja," sagði Þórir við Vísi en eins og hann segir mun hann setja sig í samband við Stjörnumenn vegna málsins.

"Mér finnst vera farið yfir strikið með svona orðbragði."

Vísir hafði einnig samband Almar Guðmundsson, formann knattspyrnudeildar Stjörnunnar, og bað um hans álit á hegðun stuðningsmannasveitarinnar. Hann baðst undan viðtali og sagðist vera að skoða málið.