Rikka illa farin eftir sýruárás í auglýsingu UN Women

Landsnefnd UN Women kynnti um helgina auglýsingaherferð sem miðar að því að vekja athygli á  sýruárásum.



„Sýruárásir er ein alvarlegasta birtingarmynd kynbundins ofbeldis,“ segir Inga Dóra Pétursdóttir, framkvæmdastýra UN Women á Íslandi.

Unnur Ösp Stefánsdóttir leikkona og verndari samtakanna, Friðrika Hjördís Geirsdóttir kokkur og rithöfundur og Margrét Erla Maack dagskrágerðarkona taka þátt í átakinu.

„Á myndunum má sjá andlit þeirra sem hefur verið skeytt saman við andlit indverskra kvenna sem lifað hafa af sýruárásir,“ segir Inga Dóra.

„Myndirnar eru átakanlegar en vekja okkur til umhugsunar hversu djúpstæð áhrif sýruárásir hafa á líf kvenna og stúlkna,“ segir Inga Dóra jafnframt.

Málefnið er Margréti Erlu hugleikið.

„Fyrir nokkrum vikum sá ég konu í strætó í Marseille sem var með sýrubrennt andlit. Hún var um fimmtugt. Hún var í hópi þeirra sem hlaut ekki augnskaða af árásinni,“ segir Margrét Erla.

„Bruninn sem er settur á andlitið mitt í eftirvinnslu á minni mynd er í alvöru á andliti stúlku sem var 15 ára þegar hún varð fyrir sýruárás þegar hún neitaði bónorði. Það er líka merkilegt ef maður setur sig í spor þessarar stúlku. Væri ég að vinna í sjónvarpi hefði ég lent í þessu 15 ára gömul? Mögulega ekki. Hefði ég fengið vinnu sem magadansmær? Nei. Væri ég að kenna Bollywooddansa þar sem stór hluti dansins eru svipbrigði? Nei,“ útskýrir Margrét.

„Ég hefði líklega ekki sóst eftir því heldur, með brotna sjálfsmynd. Ég hvet fólk til að staldra við og sjá sig fyrir sér, já eða unglingsfrænku eða dóttur í sömu sporum og mæta svo á Fiðrildafögnuðinn,“ bætir Margrét við.

Þann 14. nóvember mun UN Women standa fyrir Fiðrildafögnuði í Hörpu.

„Þar ætlum við koma saman og gleðjast yfir árangrinum sem náðst hefur í jafnréttismálum í heiminum; kraftinum sem myndast þegar konur brjóta staðalmyndir og hefðir og við ætlum að krefjast þess að mannréttindi kvenna og stúlkna séu virt,“ segir Inga Dóra.

Kvöldið er tileinkað þolendum sýruárása.

„Við fáum ógleymanlegt tækifæri að kynnast indverskum konum sem lifað hafa af slíkar árásir,“ bætir hún við.

„Fiðrildafögnuður UN Women verður ævintýralegt kvöld. Helsta listafólk Íslands leggur samtökunum lið og býður ykkur upp á magnaða upplifun,“ segir Inga Dóra að lokum og hvetur sem flesta til að mæta.

Hægt er að kaupa miða á Harpa.is og midi.is á í verslun ELLU á Ingólfsstræti 5.