Afhjúpa listaverk á Menningarnótt – Vinstri Grænir enn ósáttir við staðsetningu þess

Menningarnótt Reykjavíkur 2013 verður formlega sett laugardaginn 24. ágúst þegar Jón Gnarr borgarstjóri mun afhjúpa útilistaverk eftir bandaríska listamanninn Rafael Barrios. Listaverkið, sem nefnist Obtusa og stendur við Höfðatorg, á mótum Höfðatúns og Borgartúns, er í eigu Skúla Mogensen athafnamanns og eiganda WOW air.

Skipulagsráð Reykjavíkur samþykkti á sínum tíma að heimila Skúla að setja listaverkið upp. Þá greiddi Torfi Hjartarson, þáverandi fulltrúi Vinstri grænna í skipulagsráði og núverandi varafulltrúi, atkvæði gegn því að gerður yrði samningur við Skúla um uppsetninguna. Taldi hann „bæði óþarft og óheppilegt að koma listaverki í eigu einkaaðila fyrir á áberandi stað í almannarými utan við skrifstofur borgarinnar og móttökuhúsið Höfða". Torfi benti einnig á að Skúli ætti í „umsvifamiklum rekstri með áberandi merkingum skammt undan“, en með því var hann að vísa til þess að skrifstofur WOW air eru staðsettar rétt fyrir ofan Höfðatorg.

Torfi sagði í samtali við Vísi í dag að afstaða Vinstri Grænna til staðsetningar listaverksins sé óbreytt.

„Afstaða okkar í VG til staðsetningar á þessu tiltekna listaverki er óbreytt, það færi betur að hafa það úr tengslum við skrifstofur WOW og borgaryfirvalda. En þetta var niðurstaða skipulagsráðs á sínum tíma. Það breytir ekki því að Menningarnótt er hátíð borgarbúa borin uppi af almenningi en ekki einstökum fyrirtækjum eða peningamönnum og ég vænti þess að sá svipur verði á hátíðinni nú sem endranær.“