Undrast áhugaleysi tannlækna á bókamarkaði

„Ég er mest hissa á að tannlæknar skuli ekki hafa samband við okkur í röðum en af biðstofunum að dæma eru þeir sérfræðingar í gömlum, þvældum tímaritum,“ segir Gauti Jóhannesson, sveitarstjóri á Djúpavogi, þar sem fólki gefst nú kostur á að hirða það sem ekki kemst lengur fyrir á bókasafni bæjarins.

Gauti segir að eftir frétt Fréttablaðsins í gær hafi nokkrir hringt og spurst fyrir um einstaka titla og tímarit. „Við erum ekki í aðstöðu til að fara í ítarlega leit en höfum augun hjá okkur ef ske kynni að við rækjumst á það sem fólk vantar,“ segir Gauti sem kveður þó eigulegustu bækurnar flestar farnar.

Markaðurinn hefur verið tvíframlengdur og á nú að standa út næstu helgi.