Forseti Íslands reyndist sannspár í gær

Þjóðin er að jafna sig eftir tap íslenska landsliðsins í knattspyrnu gegn Króatíu úti í Zagreb í gær, 2 – 0. Fréttastofa ræddi við Ólaf Ragnar Grímsson í gærmorgun, og var hugur í forsetanum sem og landsmönnum öllum. Þegar forsetinn var beðinn um að spá um úrslit kaus hann að hafa vaðið fyrir neðan sig.

Ólafur Ragnar vildi ekki spá fyrir um úrslit með beinum hætti, segir það erfitt. „Nei, en það hafa margir skemmtilegir hlutir gerst í knattspyrnunni. Ég minni þig nú á það að þegar frönsku heimsmeistararnir komu til Íslands fyrir nokkrum árum, eftir að forseti Frakklands hafði sæmt þá alla sérstakri heiðursorðu í París, eftir að hafa orðið heimsmeistarar, þá náðum við nú jafntefli á Laugardalsvellinum. Við heimsmeistarana. Þannig að það sýnir nú að allt getur gerst í þessum efnum.“

Allt getur gerst. Um það efast fáir. En, ef að er gáð kemur á daginn að forsetinn hitti naglann á höfuðið þegar hann vísaði til viðureignar Íslendinga við Frakka í undankeppni EM árið 2000. Fyrri leikurinn, sem leikinn var á Laugardalsvellinum 5. september árið 1998, fór 1 – 1. Seinni leikur þeirrar viðureignar var reyndar frækinn leikur af hálfu Íslands, en tapaðist reyndar 3 – 2. Þarna skeikar því ekki nema einu marki, leikurinn gegn Frökkum tapaðist með eins marks mun en gegn Króatíu munar tveimur, og forsetinn reyndist, með þessari vísan sinni, sannspár sem svo oft áður.