Ósátt með málflutning Ragnheiðar Elínar

Töluverð umræða skapaðist á fundi Stjórnvísis í gær, sem haldinn var í höfuðstöðvum Arionbanka, undir yfirskriftinni „Samfélagsábyrgð fyrirtækja – hvert er hlutverk stjórnvalda?“, þegar Ragnheiður Elín Árnadóttir, iðnaðar- og viðskiptaráðherra, tjáði skilning sinn á hugtakinu samfélagsábyrgð fyrirtækja.

Ragnheiður Elín sagði á fundinum að hún mæti sem svo að helstu leiðir ríkisfyrirtækja til þess að sýna samfélagsábyrgð væru í formi sjóða og styrkja.

Ragnheiður lagði einnig ríka áherslu á að hlutverk stjórnvalda væri ekki að skikka fyrirtæki til eins né neins í sambandi við það að sýna samfélagslega ábyrgð í verki.

Þetta kemur fram á vefsíðu Festu í dag, sem er miðstöð um samfélagsábyrgð fyrirtækja.

Eftir fundinn var gestum í sal gefinn kostur á spurningum til ræðumanna en ekki voru allir sáttir við málflutning Ragnheiðar Elínar.

Stjórnvísi er stærsta stjórnunarfélag á Íslandi og eru tæplega tvö þúsund félagsmenn í félaginu.

Eftir dágóða umræðu í sal virðist niðurstaðan hafa verið sú að stjórnvöld á Íslandi þyrftu að kynna sér kosti samfélagslegrar ábyrgðar fyrirtækja mun betur.

Ráðherrann gat ekki svarað fyrirspurnum fundargesta því hún þurfti að yfirgefa salinn strax eftir fundinn. Aðstoðarmaður hennar Ingvar Pétur sá um að svara fyrir hennar hönd.