Markaðir Króatíu opna fyrir Íslandi

Samningaviðræðum um aðild Króatíu að EES samningunum lauk fyrr í dag með undirritun samningamanna um meginniðurstöður samningaviðræðna. Lagatæknilegur frágangur á samningnum mun þó taka nokkrar vikur.

Niðurstaðan felur í sér að EES EFTA ríkin, Ísland, Liechtenstein og Noregur, fá aðgang að markaði Króatíu og að markaði ESB. Þar að auki mun Ísland fá aukna tollfrjálsa innflutningskvóta fyrir fersk karfaflök og humar inn á markað ESB. Þetta kemur fram í tilkynningu frá utanríkisráðuneytinu.

Ríkin þrjú munu greiða alls fimm milljónir evra til uppbyggingarsjóðs EES sem renna til Króatíu og er það í samræmi við fjárframlög til nýrra aðildarríkja EES undanfarinn áratug. Þar af er hlutdeild Íslands áætluð um 161.000 evrur, eða tæplega 26,5 milljónir króna.

Þær aðlaganir sem Króatía samdi um við aðild sína að ESB munu einnig gilda innan EES og þar með talið um frjálsa för vinnuafls. Það felur í sér að Íslandi er heimilt að takmarka aðgang Króata að íslenskum vinnumarkaði í allt að sjö á. Ísland mun beita takmörkunum til 30. júní 2015 hið minnsta.