Spurði hvort hótun Hreyfingarinnar hefði áhrif á stjórnarskrármálið

Bjarni Benediktsson, formaður Sjálfstæðisflokksins, spurði Jóhönnu Sigurðardóttir forsætisráðherra að því á þingi í dag hvort það væri vegna hótunar Hreyfingarinnar um að bera fram vantrausttillögu sem ríkisstjórnin hefði ákveðið að halda áfram með stjórnarskrármálið í þinginu þrátt fyrir þá gagnrýni sem málið hefði sætt. Hreyfingin er, sem kunnugt er, ákafur talsmaður þess að stjórnarskrárfrumvarpið nái fram að ganga.

Þessu hafnaði Jóhanna Sigurðardóttir algerlega. „Hér er ekki verið að vinna að stjórnarskrárbreytingum af hálfu stjórnarliða undir einhverjum hótunum frá Hreyfingunni. Hér er einfaldlega verið að vinna samkvæmt þjóðarvilja og samkvæmt niðurstöðum þjóðaratkvæðagreiðslu," sagði Jóhanna.

Bjarni fullyrti í fyrirspurn sinni að fjölmargir stjórnarliðar úr báðum stjórnarflokkunum hefðu áhyggjur af stjórnarskrármálinu og spurði hvers vegna ríkisstjórnin tæki ekki alvarlegar en raun bæri vitni því hlutverki þingsins að setja ný stjórnskipunarlög.