Atvinnulausir hafa áhyggjur af framhaldi atvinnuleysisbóta

Nokkur fjöldi einstaklinga sem eru á atvinnuleysisbótum hefur haft samband við ASÍ og aðildarfélög þess, vegna ótta um að hætt verði að greiða atvinnuleysisbætur þar sem Atvinnuleysistryggingasjóður sé tómur og fjármagn ekki til staðar.

Þetta kemur fram í frétt á vef ASÍ.

Tilefnið mun vera að Sigmundur Davíð Gunnlaugsson, forsætisráðherra, lýsti stöðu Atvinnuleysistryggingasjóðs nýverið, í tengslum við ákvörðun um greiðslu desemberuppbótar til atvinnuleitenda.

„Til þess að það sé hægt þurfa að vera til peningar í sjóðnum. Það var ekki núna. Raunar er sjóðurinn þegar kominn í töluverðan mínus þannig að ráðherra hafði ekki fjármuni til að greiða út,“ sagði Sigmundur.

Í tilkynningu ASÍ segir: „Það fylgdi síðan með að tekist hafi að finna fé og því verði hægt að greiða út desemberuppbótina. Margir atvinnuleitendur hafa skilið orð forsætisráðherra þannig að greiðsla atvinnuleysisbóta á nýju ári séu í uppnámi enda fullyrti Sigmundur Davíð að engir peningar væru til í Atvinnuleysistryggingasjóði.“

Einnig segir að því sé rétt að fram komi að áætlaðar eignir Vinnumálastofnunnar séu á bilinu 6,3 til 6,5 milljarðar króna. „Þar til viðbótar er rétt að árétta að greiðslur atvinnuleysisbóta byggja á lögum um það efni og eru allar breytingar háðar lagabreytingum, en ekki stöðu Atvinnuleysistryggingasjóðs.“