Halda jólabasar á sunnudag

Rakel Garðarsdóttir úr kvenfélaginu Hringurinn hvetur fólk til að kaupa handverk.

„Í boði eru ótrúlega flott handverk en það eru um 350 konur í hringnum sem að eru að búa til handverk í sjálfboðastarfi árið um kring fyrir svona uppákomur,“ segir Rakel Garðarsdóttir, framkvæmdarstjóri Vesturports en hún meðlimur kvenfélagsins Hringurinn.

Á morgun fer fram Jólabasar á vegum Hringsins kl. 13 á Grand Hótel. Þar verður til sölu ýmiss varningur, jólakort félagsins, útsaumur, kökur, handverk og jólaskraut. Ágóði sölunnar rennur til styrktar börnum í landinu en Rakel segir allar konur félagsins leggja sitt að mörkum í sjálfboðastarfi.

Hringurinn var stofnaður árið 1904 og fagnar 110 ára afmæli á næsta ári. Markmið félagsins hefur verið að vinna að mannúðarmálum en uppbygging Barnaspítala Hringsins hefur verið aðalverkefni félagsins um áratugarskeið. „Það er alltaf þörf á nýjum tækjum eða aðstoð fyrir aðstandendur svo að við hvetjum alla til að koma á jólabasarinn, gera góð kaup og styrkja gott málefni í leiðinni því börnin í landinu þurfa á þessu að halda,“ segir Rakel að lokum.

Friðrika Hjördís Geirsdóttir, Hrefna Rósa Sætran og Hrefna Björk Sverrisdóttir eru einnig Hringskonur sem að leggja sitt að mörkum í Kvenfélagi Hringsins.