"Ég er ekki í neinum skáp, en ég er með þykkan skráp“

„Mér finnst það nú eiginlega blasa við af blaðafréttum, að ég hljóti að vera aðalfyrirmyndin. Ég verð nú að segja eins og er, mér finnst það nú löngu tímabært, ég er nú orðinn sextugur, að það yrði skrifað um mig leikrit,“ segir Hannes Hólmstein Gissurarson, prófessor við stjórnmálafræðideild Háskóla Íslands.

Hannes var í viðtali við Helga Seljan í Kastljósi í kvöld, og var þar spurður út í leikritið Maður að mínu skapi eftir Braga Ólafsson, sem sýnt er í Þjóðleikhúsinu um þessar mundir.

Aðalpersónan, Guðgeir Vagn sem leikin er af Eggerti Þorleifssyni, þykir minna mjög á Hannes Hólmstein og var það meðal annars staðhæft í leikdómi í DV um miðjan mánuðinn. Guðgeir er sakaður um ritstuld en svarar því til að hann steli ekki bókum heldur setji bara nafn sitt á þær.

„Gefið er í skyn að bæði Guðgeir og Klemens séu skápahommar,“ sagði í leikdómi DV. Hannes sagðist í Kastljósi í kvöld ekki hafa séð leikritið, og langaði ekki að sjá það. Sagði hann að það beri öllum saman um það að ekki megi brjóta aðallögmál listarinnar: að vera leiðinlegur.

„Á mér hvílir engin tilkynningarskylda um mitt einkalíf. Ég hef ekkert að fela þar. Ég gæti alveg sagt við þig, að ég er ekki í neinum skáp, en ég er með þykkan skráp. Þannig ég er kominn með það mikið sigg á sálina og tek því ekkert illa, og kippi mér ekkert upp við það, þó að menn deili á mig,“ sagði Hannes.

Þá sagðist hann meðal annars gera athugasemdir við leikritið, byggt á því sem hann hafi lesið um það.

„Þar eru klisjukenndar árásir á samkynhneigt fólk. Og ég hélt satt að segja að við værum vaxin upp úr því. Menn eru hvorki betri né verri fyrir það að vera hægri menn, og menn eru hvorki betri en verri að vera gagnkynhneigðir eða samkynhneigðir. Eða eins og margir fjölmiðlamenn eru, sjálfkynhneigðir, þannig að það á bara að meta menn að verðleikum,“ sagði hann.

Þegar hann var spurður hvort að honum finnist að sér vegið, þegar fólk kjafti um kynhneigð hans, sagði hann:

„Mér finnst að þetta fólk eigi að hafa frelsi. Við getum ekki látið rónann koma óorði á brennivínið,“ sagði Hannes.

Þetta særir þig ekki?

„Mér finnst menn vera of mikið í því að kveinka sér. Það er eins og æðruleysið og karlmennskan séu ekki í tísku í okkar þjóðfélagið. Það þurfa allir að vera einhver fórnarlömb. Ég lít ekki á mig sem fórnarlamb. Ég myndi frekar líta á Braga Ólafsson sem fórnarlamb, vegna þess að hann augljóslega er fórnarlamb fordóma, til dæmis um samkynhneigt fólk og hægri menn. Það blasir við af öllu því sem ég hef lesið um þetta leikrit. Og því miður er það allt á þann veginn að mig langar ekkert að fara á það, og horfa á það, þó ég sé mjög ánægður með viðfangsefnið sjálft.“

Viðtalið má horfa á hér.