Grunaðir innbrotsþjófar enn í gæsluvarðhaldi

Gæsluvarðhald yfir þremur mönnum sem grunaðir eru um að eiga aðild að fjölda innbrota og þjófnaða úr verslunum á höfuðborgarsvæðinu og á Akureyri, rennur út á morgun. Málið er enn í rannsókn hjá lögreglunni sem mun taka ákvörðun á morgun um framlengingu á varðhaldinu. Mennirnir hafa setið í gæsluvarðhaldi frá 20. desember.

Mennirnir voru handteknir á Vesturlandsvegi að kvöldi 17. desember síðastliðinn en þeir voru á leið til borgarinnar frá Akureyri. Nokkrum klukkutímum aður hafði verið tilkynnt um innbrot í tvö hús á Akureyri og bankað upp á í að minnsta kosti tveimur húsum til viðbótar. En þar var heimilisfólkið heima þannig að þeir létu sig hverfa, en fólkið gaf lýsingu og númer á bíl þeirra.

Málið er nokkuð umfangsmikið og hefur rannsókn staðið yfir í um tvær vikur.