"Stjórnendur hafa ekki enn gert sér grein fyrir alvarleika málsins"

Sérstök aðgerðaáætlun sem virkjuð var á Landspítalanum í dag felur í sér að sérfræðingar taki á sig meiri vinnu. Þetta segir framkvæmdarstjóri lækninga á Landspítala. Deildarlæknir segir vinnuálagið óviðunandi og allt of seint gripið í taumana.

Lyflækningasvið er stærsta svið Landspítalans, en þar er gert ráð fyrir stöðum tuttugu og fimm  deildarlækna. Aftur á móti eru starfandi læknar í dag undir tíu talsins og fer læknunum fækkandi með haustinu þegar læknanemar fara aftur í nám. Margir ætla ekki að starfa hjá deildinni í vetur vegna óánægju.

Ingibjörg Kristjánsdóttir er deildarlæknir á lyflækningasviði. Hún segir lækna allt of fáa og stöðuna grafalvarlega.

„Staðreyndin er sú að bæði deildarlæknar og sérfræðilæknar hafa verið að vara stjórnendur við í yfir ár. Það er mjög mikil óánægja, bæði hjá ungum læknum og sérfræðilæknum á spítalanum vegna vinnuaðstöðunnar og álagsins. Það er mikið álag á daginn og vaktabyrgðin er mikil," segir Ingibjörg.

Ólafur Baldursson, framkvæmdarstjóri lækninga á Landspítala, sagði í samtali við fréttastofu að hann gerði ráð fyrir að aðgerðaráætlunin standi yfir í nokkrar vikur. Aðspurður segir Ólafur að breytingarnar muni ekki koma niður á sjúklingum, að minnsta kosti ekki ennþá. Þá segir hann að nú þegar sé verið að vinna að ýmsum lausnum á málinu. Ingibjörg segir að yfirmenn á Landspítalanum virðist ekki gera sér grein fyrir alvöru málsins.

„Það er mjög alvarlegt þegar það lítur út fyrir að okkar yfirmenn, og stjórnendur spítalans, virðist ekki ennþá vera að átta sig á alvarleika stöðunnar. Það er engin deila í gangi á milli lækna og stjórnenda, heldur er þetta neyðarástand sem hefur skapast vegna þess að ekki var gripið fyrr í taumana," segir Ingibjörg.