Róbert Spanó verður Umboðsmaður með Tryggva

Róbert Spanó, prófessor við lagadeild Háskóla Íslands, hefur verið settur tímabundið Umboðsmaður Alþingis samhliða Tryggva Gunnarssyni.

Ástæðan er sú að Alþingi hefur falið Tryggva að vinna að gerð fræðsluefnis fyrir starfsfólk stjórnsýslu ríkis og sveitarfélaga. Þar verður fjallað um reglur sem gilda um starfshætti stjórnsýslunnar og þær sérstöku reglur sem gilda um meðferð mála þar.

Róbert R. Spanó er prófessor við lagadeild Háskóla Íslands og hefur undanfarið verið forseti deildarinnar. Róbert starfaði hjá umboðsmanni á árunum 1998 til 2004, lengst af sem aðstoðarmaður umboðsmanns.