Pönkarar sem öskra ljóðin sín

Hljómsveitin Kælan mikla semur tónlist í kringum ljóð Sólveigar Matthildar.

„Við erum með eitthvað sem heitir ljóðapönk. Þegar við semjum lög byrjum við á því að hugsa um ljóðin og búum til lög í kringum þau. Við erum svo miklir pönkarar að það endar yfirleitt á því að við öskrum ljóðin.“

Ætli meðlimir Kælunnar miklu séu þá svona reiðir? Sólveig Matthildur segir svo ekki vera.

„Við bara fílum þessa tjáningu.“

Sólveig spilar á mörg hljóðfæri. Fyrst æfði hún á þverflautu, síðan saxófón og loks gítar. Í hljómsveitinni spilar hún þó á trommur, sem gerðist alveg óvart að hennar sögn.

Hún á ekki neinar sérstakar fyrirmyndir í skáldskapnum og játar að hafa í raun ekki byrjað að lesa ljóð fyrr en hún fór að skrifa ljóð sjálf. Upphaflega stóð ekki til hjá henni að skrifa ljóð, heldur dagbækur, en síðan fór hún að leika sér með textana og úr urðu ljóð.

Í kvöld spilar hljómsveitin Kælan mikla í Tjarnarbíói á Unglist, Listahátíð ungs fólks, ásamt hljómsveitinni Kjurr, RetRo Bot, Aragrúa og In the Company of Men. Viðburðurinn er skipulagður af Hinu húsinu og hefst klukkan 20.

Kælan mikla vann Ljóðaslamm Borgarbókasafnsins í febrúar á þessu ári. Hljómsveitin spilaði á off-venue Airwaves viðburði á Dillon um helgina. Sólveig Matthildur Kristjánsdóttir, trommari og textahöfundur sveitarinnar, segir að tónleikarnir hafi gengið rosalega vel.

„Það mætti fullt af fólki og okkur voru boðnir stúdíótímar. Áheyrendur vildu líka taka myndir af okkur.“