Telja að 3.500 leiguíbúðir vanti á leigumarkað

Forsvarsmenn hinna nýstofnuðu Samtaka leigjenda telja að bráðavandi sé á leigumarkaði. Þeir telja að alls vanti um 3.500 leiguíbúðir í Reykjavík. Forsvarsmenn samtakanna funduðu með Degi B. Eggertssyni, formanni borgarráðs Reykjavíkur, í gær.

Jóhann Már Sigurbjörnsson, formaður samtakanna, segir fundinn hafa gengið vel, en þó sé ljóst að lausn vanti á þeim bráðavanda sem uppi er á leigumarkaðinum.

„Vandinn er mjög stór og samtökin telja að þörf sé fyrir um 3.500 íbúðir sem þyrftu að koma strax á markaðinn. Við vitum að 500 manns eru að leita að húsnæði og það er sýnilegi vandinn. Eftir að hafa borið saman bækur okkar teljum við að vandinn á svarta markaðinum sé enn stærri,“ segir Jóhann.



Hann segir hugmyndir sem uppi séu hjá borginni góðar, en taka muni þrjú til fimm ár að klára þær. „Við munum áfram þrýsta á að reyna að koma með lausnir, helst innan sex mánaða. Dagur er opinn fyrir því að ræða þetta frekar og við munum funda aftur með honum eftir tvær vikur.“