Nemendum úthlutað stæði undir rafmagnsvespur

Margir vegfarendur um Áslandið í Hafnarfirði hafa vafalaust rekið augun í hóp rafmagnsvespa sem taka undir sig stóran hluta af bílastæði skólans á skólatíma.

Leifur Garðarsson, skólastjóri Áslandsskóla, segir nemendur hafa fullt samþykki fyrir því að leggja á bílastæði skólans og að viss hluti bílastæðisins sé nú ætlaður undir rafmagnsvespur.

„Þegar nemendur fóru að koma á þessum rafmagnsvespum í skólann þá þurftum við að finna út hvar ætti að leggja þeim. Þegar þeim var lagt á meðal annara bifreiða á bílastæðinu var alltaf hætta á að vespurnar myndu detta utan í þær og skemma. Þá kom upp sú hugmynd að nemendur fengju sitt eigið svæði á bílastæðinu þar sem þeir gætu lagt vespunum. Við tókum því af skarið og skipulögðum þetta verkefni. Það hefur gengið vel að fá nemendur til að leggja á þessu tiltekna svæði enda erum við hér í Áslandsskóla einstaklega heppin með nemendur,“ segir Leifur Garðarsson, skólastjóri.