Kvennaskólinn í sigurvímu

Framkvæmdakeppnin Boxið fór fram um síðustu helgi í Háskólanum í Reykjavík.

„Það var svo gaman að fylgjast með hvernig þau unnu saman en þau stóðu sig svo vel og það var svo mikill keppnisandi í liðunum. Liðsheildin hafði jafnvel mest að segja um hvaða árangri þau náðu,“ segir Guðrún Sævarsdóttir, forseti tækni- og verkfræðideildar Háskólans í Reykavík.

Um síðastliðna helgi fór fram úrslitakeppni framkvæmdakeppninnar Boxið en þar var keppt í hugvitssemi og verkviti. Samtök iðnaðarins, Háskólinn í Reykjavík og Samband íslenskra framhaldsskólanema stóðu að keppninni. Guðrún segir að mikill skortur sé á starfsfólki í iðnaði og tækni þrátt fyrir verulegt atvinnuleysi og bendir á að Boxið sé fjölbreyttari en flestar aðrar keppnir sem endurspegla atvinnulífið.

Hvert lið var skipað fimm einstaklingum sem fengu hálftíma til að leysa hverja þraut sem hönnuð var af fyrirtækjum úr ólíkum greinum atvinnulífsins með aðstoð fræðimanna Háskólans í Reykjavík. „Þessi keppni reynir á útsjónarsemi, hæfileikann til að greina vandamálið, hópvinnu og færni í mannlegum samskiptum en á allt þetta reynir þegar þú kemur út á vinnumarkaðinn,“ útskýrir Guðrún.

Í úrslitum voru Menntaskólinn í Reykjavík, Verslunarskóli Íslands, Tækniskólinn, Menntaskólinn við Sund, Fjölbrautaskóli Suðurlands, Flensborgarskóli, Kvennaskólinn og Menntaskólinn við Hamrahlíð.

Á síðasta ári sigraði Menntaskólinn í Reykjavík í Boxinu en í þetta sinn var það Kvennaskólinn sem bar sigur úr býtum. Í öðru sæti var Menntaskólinn í Reykjavík og í þriðja sæti var Fjölbrautaskóli Suðurlands. 

Liðsstjóri Kvennaskólans, Ólöf Svafarsdóttir, segir sigurinn hafa komið skemmtilega á óvart þar sem hópurinn hafi farið inn í keppnina með engar væntingar. „Við unnum rosalega vel saman og fengum öll Ipad Mini og gjafabréf í Lasertag í verðlaun svo við erum í sigurvímu,“ segir Ólöf glöð í bragði.