"Ég faðmaði köttinn minn"

Nafn? Áslaug María Friðriksdóttir

Aldur? 44 ára

Starf? Borgarfulltrúi

Hvern faðmaðir þú síðast? Köttinn minn.

En kysstir? Ég kyssti börnin.

Hver kom þér síðast á óvart og hvernig?

Kötturinn sem hafði lagt sig í þvottavélinni og spratt út úr henni á mjög óvæntan hátt þegar átti að fara að þvo.

Hvaða galla í eigin fari ertu búin að umbera allt of lengi?

Ég reyni að pæla sem minnst í öllum göllunum, það er svo leiðinlegt.

Ertu hörundsár? Oftast ekki, en kannski stundum.

Dansarðu þegar enginn sér til? Já, en oftar þegar margir sjá til.

Hvenær gerðirðu þig síðast að fífli og hvernig?

Fyrir nokkrum dögum settist ég inn í bíl og hélt að það væri vinkona mín að sækja mig. Ég setti á mig beltið í rólegheitum og var byrjuð að kjafta við hana þegar ég fattaði að ég þekkti bílstjórann ekki neitt og hann starði á mig með undrun en skellihló svo bara þegar hann uppgötvaði í hvaða fáránlegu stöðu ég var búin að koma mér.

Hringirðu stundum í vælubílinn? Nei, það er óþarfi að eyða símtali í það.

Tekurðu strætó? Alltof sjaldan.

Hvað eyðirðu miklum tíma á Facebook á dag?

Nú í prófkjörsbaráttunni er ég stanslaust með Facebook opna og er auðvitað að gera vini mína geðveika með alls kyns áróðri. En nú er bara síðasti spretturinn eftir og þá er spurning hvort maður reyni ekki að slaka aðeins á Facebook-notkuninni.

Ferðu hjá þér þegar þú hittir fræga eða heilsarðu þeim?

Heilsa þeim ef ég kannast við þá, fer nú ekkert sérstaklega hjá mér, held ég.

Lumarðu á einhverju sem fáir vinir þínir vita um þig? Já.

Hvað ætlarðu alls ekki að gera um helgina?

Rólegheit verða ekki á dagskrá, ég ætla að gefa síðustu klukkutímunum í prófkjöri alla mína orku.