"Mamma, ást er ást, hvað sem þú ert,“

Leikkonan Maria Bello er komin út úr skápnum.

Bello er 46 ára gömul og hefur leikið í kvikmyndum á borð við A History of Violence og Prisoners. Hún birti grein í New York Times á föstudaginn þar sem kemur fram að hún eigi í ástarsambandi við konu. Í greininni segir hún einnig frá því hvernig hún sagði 12 ára syni sínum frá sambandinu.

Bello sagði frá því þegar Jackson, sonur hennar sem hún á með framleiðandanum Dan McDermott, spurði hana hvort hún ætti í ástarsambandi.

„Hann hafði rétt fyrir sér. Ég var í sambandi og ég var ekki búin að segja honum frá því,“ ritar leikkonan og bætir því við að sálfræðingurinn hennar hafi ráðlagt henni að bíða með að segja syni sínum frá þar til hann myndi spyrja hana.

„Ég var byrjuð með konu sem er besta vinkona mín og eins og guðmóðir fyrir barninu mínu,“ bætir hún við.

Bello segist einu sinni áður hafa verið í sambandi við konu áður en hún byrjaði með núverandi kærustu sinni, Clare, en að þeim undanskildnum séu öll fyrrum sambönd stjörnunnar við karlmenn.

Um það bil ári áður en hún átti þetta samtal við son sinn, var Bello að fletta í gegnum gamlar myndir af gömlum kærustum.

„Ég var að fletta í gegnum myndirnar og fann svart-hvíta mynd af bestu vinkonu minni og mér sem var tekin á gamlárskvöld. Við vorum svo hamingjusamar á myndinni, ég gat ekki annað en brosað. Ég rifjaði upp hvernig við höfðum kynnst, tveimur árum áður. Við náðum strax vel saman en ég hugsaði ekki um hana á rómantískan eða kynferðislegan hátt. Hún var ein fallegasta, mest heillandi, fyndnasta og greindasta manneskja sem ég hafði hitt, en ég hafði ekki hugmynd um að við myndum einhverntíma enda í ástarsambandi,“ heldur hún áfram.

Bello segist strax hafa orðið áhyggjufull um afleiðingar þess að hefja samband með konu. Hvers kyns áhrif það myndi hafa á soninn - og hún viðurkennir líka, að hún hafi velt því fyrir sér hvernig afhjúpunin myndi hafa áhrif á ferilinn.

Hún segir frá því þegar hún kom út úr skápnum fyrir fjölskyldunni sinni, sem hún lýsir sem stórri, hefðbundinni ítalskri-pólskri fjölskyldu frá Philadelphia-fylki. 

„Faðir minn brást hinn besti við og sagði að Clare væri góð stelpa, góð fyrir mig. Móðir mín og allir hinir líka,“ heldur hún áfram.

„Kannski erum við ekki jafn hefðbundin fjölskylda og ég hélt.“

Án þess að fara nánar út í hvað það var sem hrjáði hana, sagði leikkonan einnig frá því að hún hefði orðið alvarlega veik síðasta sumar, og að Clare, Jackson, foreldrar hennar og bróðir, og barnsfaðir hennar hefðu verið hjá henni á spítalanum á hverjum einasta degi.

Það var þegar hún var að ná sér af veikindunum sem að Jackson spurði út í ástarlíf móður sinnar og stóra afhjúpunin átti sér stað.

„Mamma, ást er ást, hvað sem þú ert,“ svaraði sonurinn.