Makríll aldrei mælst jafn mikill

Fiskifræðingar frá Færeyjum, Íslandi og Noregi telja um 8,8 milljónir tonna af makríl vera í Norðaustur-Atlantshafi. Þar af eru 1,5 milljón tonn eða rúm 17 prósent innan íslenskrar efnahagslögsögu.

Þetta er útkoman úr sameiginlegum leiðangri þessara þjóða til rannsókna á makríl fyrr í sumar.

Aldrei áður hefur mælst jafn mikið af makríl á heildarsvæðinu, en magn makríls innan íslenskrar lögsögu reyndist vera svipað og á síðasta ári.

Í tilkynningu frá Hafrannsóknastofnun kemur fram að svæðið, sem kannað var í ár, var mun umfangsmeira en áður og kann það að skýra að einhverju leyti þá aukningu sem mældist á heildarmagninu.

Fjögur skip tóku þátt í leiðangrinum, eitt frá Íslandi, eitt frá Færeyjum og tvö frá Noregi.

Aldursgreiningar sýndu að 20 prósent makrílsins var úr árganginum frá 2010. Einnig voru áberandi árgangarnir frá 2006, 2007 og 2011.