Hafnarfjarðarbær greiðir ekki lífeyri til starfsmanna Sparisjóðs Hafnarfjarðar

Bæjarráð Hafnarfjarðar hefur ákveðið að ábyrgð bæjarins á greiðslu lífeyris taki ekki til sjóðfélaga sem verið hafa starfsmenn Sparisjóðs Hafnarfjarðar.

Í tilkynningu frá Hafnarfjarðarbæ segir að starfsmönnum Sparisjóðs Hafnarfjarðar hafi verið heimilað að ganga í Eftirlaunasjóð starfsmanna Hafnarfjarðarkaupstaðar árið 1973. Ekki verði horft fram hjá þeim mikilvægu hagsmunum sem liggja undir í þessu máli. Þeir snúi ekki aðeins að sameiginlegum hagsmunum bæjarbúa heldur líka og ekki síður þeirra einstaklinga sem störfuðu hjá Sparisjóði Hafnarfjarðar og greiddu í góðri trú hluta af launum sínum í umræddan sjóð. Hagsmunir þeirra séu nú í uppnámi og ekki síst þess vegna er gríðarlega mikilvægt að niðurstaða fáist sem fyrst um hver þeirra staða sé. Hjá Hafnarfjarðarbæ og lýðræðislega kjörinni bæjarstjórn hvílii að sama skapi sú ábyrgð að álitamál tengd svo umfangsmiklum skuldbindingum séu útkljáð með eins mikilli vissu og hægt sé og fyrir dómstólum ef þess reynist þörf.