Er Keflavíkurflugvöllur að verða af milljörðum?

Ríkissjóður verður árlega af um milljarði króna í tekjur af farþegum Icelandair sem millilenda á Keflavíkurflugvelli en borga ekki gjöld fyrir afnot af flugvellinum. Íslenskir farþegar borga þessi sömu gjöld á erlendum flugvöllum. Talsmaður Isavia segir upphæðina ekki svo háa.

Tengifarþegar sem koma hingað til lands, millilenda og halda áfram för sinni til Evrópu eða Norður-Ameríku, borga engin millilendingargjöld fyrir afnot af Keflavíkurflugvelli líkt og tíðkast á öðrum flugvöllum. Samkvæmt upplýsingum sem fréttastofa hefur undir höndum þá gæti áætlaður tekjumissir Isavia, sem rekur Keflavíkurflugvöll, verið nálægt milljarði króna fyrir árið 2013. Sé reiknað þrjú ár aftur í tímann nemur upphæðin um 2,7 milljörðum króna samkvæmt útreikningum fréttastofu.

Friðþór Eydal, talsmaður Isavia, segir upphæðina ekki vera svo háa. Hann vildi ekki nefna hversu háa fjárhæð Isavia verður af árlega vegna þessa. Hann ítrekar jafnframt að þeir farþegar sem millilenda hér á landi borgi lendingargjald líkt og á öllum öðrum flugvöllum, hins vegar skilji farþegar ekki eftir sig gjöld til að mæta kostnaði við þjónustu í flugstöðinni.

426 þúsund tengifarþegar í ár

Tengifarþegar Icelandair á Keflavíkurflugvelli eru um 426 þúsund það sem af er þessu ári. Þeir farþegar borga þó ekki millilendingargjald á Keflavíkurflugvelli líkt og þegar t.d. íslenskir farþegar millilenda á Kaustrup í Kaupmannahöfn, Heathrow í London eða Frankfurt í Þýskalandi og halda áfram flugi. Hvers vegna þessi gjöld ekki innheimt á Keflavíkurflugvelli?

„Það hefur ekki tíðkast frá upphafi að innheimta þetta gjald. Þetta er flugleið sem hefur verið byggð upp á mjög löngum tíma og það hefur þurft mikið til. Eflaust má líta á þetta sem innlegg í þá uppbyggingu,“ segir Friðþór Eydal, talsmaður Isavia.

Icelandair eina flugfélagið

Icelandair er eina flugfélagið sem millilendir á Keflavíkurflugvelli á leið sinni milli Norður-Ameríku og Evrópu. Friðþór neitar því að um beinan ríkisstyrk sé að ræða til Icelandair en fyrirtækinu hafi vissulega verið hjálpað í að festa sig í sessi á þessari flugleið.

Tekjumöguleikar Isavia eru talsverðir. Ef miðað er við að tengifarþegum hingað til lands fjölgi um 5% næstu fimm ár þá gætu tekjur Isavia aukist um 5,5 milljarða króna. Þar með gæti félagið ráðist í stækkun flugstöðvarinnar á Keflavíkurflugvelli og um leið aukið umsvif sín. Isavia segir það á döfinni að hefja innheimtu á þessum gjöldum frá og með næsta sumri. Þá áætlar WOW Air að því að hefja flug á milli Evrópu og Norður-Ameríku. Er þetta tilviljun?

„Nei, ekki fremur en ef gjöldin hefðu verið tekin upp þegar Iceland Express hóf flug á sömu leið í fyrra,“ segir Friðþór. Búist er við mikilli fjölgun tengifarþega strax á næsta ári. Hefði ekki verið ráðlegt að hefja gjaldtöku fyrr?

„Það hefði auðvitað verið æskilegt en ég held að aðstæður hafi ekki leyft það á þeim tíma,“ segir Friðþór Eydal, talsmaður Isavia.