Ný íslensk verksmiðja: Stóreykur verðmæti sjávarafurða

Lokaprófanir standa nú yfir í Garði á Reykjanesi á verksmiðjunni sem fyrirtækið Héðinn hefur þróað í samstarfi við Matís og sjávarútvegsfyrirtæki. Um er að ræða nýtt framleiðsluferli sem er nógu lítið og hagkvæmt fyrir framleiðslu mjöls og fiskolíu úr annars ónýttum úrgangi. Afköstin eru rúm sjö tonn á sólarhring. „Við erum búnir að vera í nokkur ár að þróa þessa verksmiðju og teljum að því starfi sé lokið og hún sé tilbúin,“ segir Gunnar Pálsson, þróunarstjóri Héðins.

Framleiðslan er að öllu leyti sjálfvirk en hægt er að vakta hana hvaðan sem er, í gegnum netið. Aðspurður nefnir Gunnar smæðina sem helsta styrk verksmiðjunnar. „Hún er lítil miðað við það sem þekkist fyrir mjölverksmiðjur. Svo nýtir hún líka allt hráefnið og skilar raunverulega engu frá sér nema vatninu,“ segir hann.

Ábatasamt er að nýta hráefni sem annars færi til spillis. 24 þúsund krónur kostar að farga einu tonni af slógi. Heimsmarkaðsverð á mjöli og fiskolíu er um 240 þúsund á tonn og það þarf fimm tonn af slógi til að framleiða eitt tonn af mjöli. Valið snýst því um að borga 120 þúsund fyrir að farga fimm tonnum eða fá 240 þúsund eða meira fyrir afurðirnar sem fást úr þeim.

Stefnt er í útrás með verksmiðjuna. „En það er auðvitað heimamarkaður líka sem er góður, að minnsta kosti til prófana. Þótt hann sé ekki mjög stór er það upplagður staður til að þróa svona tækni á og síðan vonumst við til að geta farið með þetta víða,“ segir Gunnar.