Fjölskylda í skuldasúpu eftir Eir

Stofnuð voru hagsmunasamtök íbúarétthafa á Eir í gær. Talsverð óánægja er meðal íbúa sem fjölmenntu á stofnfundinn. Ekki unnið með hagsmuni íbúa að leiðarljósi segir talsmaður íbúa Eir.

Fjölmörg dæmi er um að einstaklingar og fjölskyldur þeirra hafi tapað miklum fjármunum á því að kaupa íbúarétt á Eir. Faðir Gunnars Skagfjörð fór inn á Eir árið 2011 þá níræður að aldri og lést hann fyrr á þessu ári. Sjáfur lagði hann fram fimm milljónir en bróðir Gunnars reiddi fram fimm milljónir til viðbótar til að tryggja föður sínum íbúarétt. Þessar 10 milljónir eru að öllum líkindum glataðar í dag eftir viðskipti við Eir og gæti sú upphæð orðið enn hærri að loknum erfðaskatti.

„Við stöndum frammi fyrir því að dánarbúið er gjaldþrota. Þetta skuldabréf sem á að gefa út, við sjáum ekki fram á að það sé pappírsins virði,“ segir Gunnar Skagfjörð.

Gunnar tekur það skýrt fram að öll þjónusta sem faðir hans fékk á Eir hafi verið til fyrirmyndar. Fjármál Eir séu hins vegar í dularfullu horfi. „Okkur finnst með ólíkindum að þeir aðilar sem einir eiga að bera þungann í þessu séu íbúarétthafar. Það virðast allir aðrir fá sitt,“ bætir Gunnar við.

Skuldabréf til 30 ára

Staða íbúarétthafa á Eir er flókin. Upphaflega átti að greiða þeim búseturétt að fullu tilbaka sex mánuðum eftir að íbúi flutti út eða féll frá. Eir er hins vegar nánast gjaldþrota og hefur boðið íbúarétthöfum skuldabréf sem greiða á til 30 ára. Það hugnast fáum.

„Við teljum að líkur séu á að íbúarétthafar eigi eignaréttakröfu eða þá veðkröfu,“ segir Sigríður Kristinsdóttir hæstaréttarlögmaður. Hún hefur unnið að málinu með hagsmunasamtökum íbúarétthafa.

Gunnar segir nauðsynlegt að opinberir aðilar komi að málinu. „Þetta fólk sem er í rauninni ábyrgt á bakvið tjöldin það þarf að koma fram og sýna sig,“ segir Gunnar Skagfjörð að lokum.