Verslun með læknadóp á facebook

Verslun með lyfseðilskyld lyf fer með auknum hætti í gegnum samskiptamiðla á borð við facebook. Lyfjaeftiriltsaðilar fá tugi ábendinga í hverjum mánuði en erfitt getur reynst að elta þær uppi, enda eru gefin upp fölsk nöfn á síðunum.  

Eins og sjá má á þessum facbook síðum þá auglýsa fíklar bæði eftir lyfjum á síðunum eða bjóða þau til sölu.

Á þremur tilteknum síðum sem fréttastofa skoðaði var meðal annars boðið uppá 36 mg af concerta til sölu,  „róró“ sem er slangur fyrir flúnidízepam, öðru nafni rohypnól og einnig Oxcontin.

Ólögmæt neysla á ópíumskyldum lyfjum líkt og Oxycontin er samkvæmt upplýsingum fréttastofu að færast mikið í aukana. Stöð 2 greindi frá því á dögunum að lyfið, sem er afar sterkt verkjalyf og fremur nýtt á markaði, væri ekki aðeins í umferð hjá langt leiddum fíklum. Það væri einnig í gangi á meðal ungmenna á skemmtistöðum um helgar og þá tekið inn í bland við önnur fíkniefni líkt og mdma, til þess að lengja virkni þeirra.

Annað dæmi um aukningu á neyslu lyfseðilskildra lyfja finnst meðal annars inni á Vogi þar sem um eitthundrað manns eru nú í viðhaldsmeðferð við morfínfíkn. Slíkur fjöldi hefur ekki verið í slíkri meðferð áður.  

Færst hefur í aukana að fíklarnir noti sterka morfínplástra, sem skrifaðir eru út, meðal annars til krabbameinssjúkra, eymi þá og ýmisst sprauti þeim í líkamann eða jafnvel drekki eymaðan vökvann.