Innbrotahrina upplýst í Kópavogi

Lögreglan á höfuðborgarsvæðinu hefur upplýst sex innbrot í heimahús í Kópavogi í síðustu viku.

Maður um þrítugt var handtekinn í þágu rannsóknarinnar, en við húsleit á heimili hans fannst þýfi úr innbrotunum en þetta kemur fram í fréttatilkynningu frá lögreglunni á höfuðborgarsvæðinu.

Hinum stolnu munum hefur nú verið komið aftur í réttar hendur, en lögreglu tókst að endurheimta allt sem stolið var. Á meðal þess sem innbrotsþjófurinn tók voru fartölvur, myndavélar og skartgripir.

Handtöku innbrotsþjófsins má ekki síst þakka árvekni ónefnds íbúa, en sá lét lögreglunni í té upplýsingar sem komu henni á sporið með fyrrgreindum árangri.