Bréfamaraþon Amnesty stærsti mannréttindaviðburður heims

Amnesty International stendur fyrir bréfamaraþoni Amnesty dagana í kringum 10. desember, en þá er alþjóðlegum mannréttindadegi fagnað. Um er að ræða stærsta mannréttindaviðburð heims, og munu tugþúsundir einstaklinga koma saman í 77 löndum um allan heim í þeim tilgangi að sýna þolendum mannréttindabrota stuðning og þrýsta á stjórnvöld sem bera ábyrgð á pyndingum, óréttmætri fangelsun og annarri illri meðferð á einstaklingum í eigin landi.

Í tilkynningu segir að á Íslandi sé búist við að send verði utan rúmlega 50 þúsund bréf, kort og undirskriftir á bréfamaraþoninu sem fram fer á fjórtán stöðum á landinu. Upplýsingar um staðina sem bréfamaraþonið fer fram er að finna á heimasíðu Amnesty.

Á sumum stöðum halda einstaklingar utan um framkvæmd bréfamaraþonsins en annars staðar var leitað eftir þátttöku almenningsbókasafna. Þá taka ellefu framhaldsskólar víðs vegar um landið þátt.

Bréfin bera árangur

Fjöldi einstaklinga sem hafa sent Amnesty International þakkarbréf í gegnum árin votta það að bréfin beri árangur. Þau lýsa öll á einlægan hátt þeim áhrifamætti sem býr í þeirri einföldu aðgerð að setja blek á blað.

Fyrir þolendur mannréttindabrota og fjölskyldur þeirra eru bréfin tákn um alþjóðlega samstöðu fólks sem lætur sér annt um réttindi þeirra og mannlega reisn.

Einu bréfi til stjórnvalda er kannski ýtt til hliðar en það er erfitt að hunsa þúsundir slíkra bréfa sem öll fela í sér kröfu til stjórnvalda um úrbætur.

Þátttaka Íslendinga, á árinu sem senn er að líða, í aðgerðum í þágu þolenda mannréttindabrota slær öll met. Um 30 þúsund Íslendingar eða 10 prósent landsmanna tóku þátt í 150 þúsund aðgerðum Íslandsdeildarinnar á árinu 2013.

Þeir sem ekki komast á einhvern þeirra staða sem að bréfamaraþonið er haldið geta tekið þátt á netákallssíðu Íslandsdeildar Amnesty International.