Breytt verklag í kynferðisbrotamálum vekur reiði þolenda: "Nauðsynlegt fyrir sálina að kærur hafi afleiðingar"

Þegar kynferðisbrot voru kærð var venjan að kalla meinta gerendur í skýrslutöku en í kjölfar holskeflu slíkra kæra á fyrri hluta þessa árs hefur lögregla breytt verklagsreglum vegna tilmæla frá ríkissaksóknara. Nú eru meintir gerendur ekki lengur kallaðir í skýrslutöku ef sökin er augljóslega fyrnd og þetta eru þolendur kynferðisbrota ósáttir við.

Ungur maður sem kærði fyrnt brot í upphafi ársins fékk nýlega upplýsingar um breyttar reglur og hefur þetta að segja:

„Ég vissi alltaf að hann yrði ekki ákærður en fannst bót í máli að hann væri alla vega látinn svara fyrir gjörðir sínar. Hann kemst svo ódýrt frá þessu, fær bara bréf frá lögreglunni sem hann getur hent og þarf aldrei að hugsa um þetta aftur.“

Hann gagnrýnir jafnframt að breytingin hafi ekki verið tilkynnt og vissi réttargæslumaður hans til dæmis ekki af henni. Ungi maðurinn segir að hugsanlega hefði hann dregið kæru sína til baka hefði hann vitað að hinn kærði yrði laus allra mála.

„Ég steig fram og opnaði mig en græddi ekkert á því og nú hefur maðurinn sem misnotaði mig nafnið mitt, sem mér finnst mjög óþægilegt.“

Henry Ragnarsson kærði Karl Vigni Þorsteinsson fyrir kynferðisbrot sem var fyrnt og hann er á sama máli og ungi maðurinn. „Ég tel þetta stórt skref afturábak. Það er alveg nógu erfitt fyrir þolendur að horfast í augu við sjálfa sig og taka þá ákvörðun að þetta sé ekki þeim sjálfum að kenna, þótt ríkið spyrni svo ekki líka á móti. Þótt málið fari kannski ekki lengra þá skipta viðbrögð fólks í kringum mann miklu meira máli en að gerandinn sijti inni eða annað. Það er nauðsynlegt fyrir sálartetrið að kærur hafi einhverjar afleiðingar í för með sér,“ segir Henry.

Karl Vignir játaði nokkur fyrnd brot og Henry telur víst að fleiri myndu gera það sama yrðu þeir kallaðir fyrir lögreglu. „Þegar menn eru teknir og settir í dagsbirtuna er möguleiki á að þeir brotni niður og segi sannleikann. Svo er líka annað; eru þeir ennþá að þessu og gætu skýrsutökur kannski hrætt þá frá því að halda áfram?“