Fá heimild til að bjóða fram einn lista fyrir bæði Reykjavíkurkjördæmin

Stjórnmálaflokkar fá heimild til að bjóða fram einn sameiginlega lista fyrir bæði Reykjavíkurkjördæmin samkvæmt frumvarpi sem tíu þingmenn úr fjórum flokkum hafa lagt fram á Alþingi.

Meðal flutningsmanna frumvarpsins eru Svandís Svavarsdóttir, formaður þingflokks VG, Helgi Hjörvar, formaður þingflokks Samfylkingarinnar, Birgitta Jónsdóttir, formaður þingflokks Pírata og Sigrún Magnúsdóttir, formaður þingflokks framsóknarmanna.

Í greinargerð með frumvarpinu segir að skipting Reykjavíkur í tvö kjördæmi hafi verið gagnrýnd fyrir þá sök að hún eigi sér ekki stoð í vitund borgarbúa heldur sé hún til málamynda.

Stjórnmálasamtök sem bjóða fram í þingkosningum í Reykjavíku viðhafi flest hver sameiginlegt prófkjör eða val fyrir bæði kjördæmin. Þá segir ennfremur í greinargerðinni að verði frumvarpið að lögum muni það ýta undir það viðhorf að þingmenn sem eru kjörnir á þing í Reykjavík verði þingmenn höfuðborgarinnar allrar en ekki einungis hluta hennar.