Framkvæmdarstjóri Festu: Ekki óánægja með Ragnheiði

„Það var beinlínis ekki óánægja með Ragnheiði Elínu [Árnadóttur] á fundinum en gestum fundarins þótti nauðsynlegt að meiri fræðsla um samfélagsábyrgð þyrfti að eiga sér stað innan ráðuneytisins,“ segir Ketill Berg Magnússon, framkvæmdastjóri Festu.

Umræða skapaðist á fundi Stjórnvísis í gær, sem haldinn var í höfuðstöðvum Arionbanka, undir yfirskriftinni „Samfélagsábyrgð fyrirtækja – hvert er hlutverk stjórnvalda?“, þegar Ragnheiður Elín Árnadóttir, iðnaðar- og viðskiptaráðherra, tjáði skilning sinn sig á hugtakinu samfélagsábyrgð fyrirtækja.

Ragnheiður Elín sagði á fundinum að hún mæti sem svo að helstu leiðir ríkisfyrirtækja til þess að sýna samfélagsábyrgð væru í formi sjóða og styrkja.

Fram kom í frétt á vefsíðu Festu fyrr í dag að ekki voru allir á eitt sáttir með þann skilning sem ráðherra og aðstoðarmaður ráðherra lögðu í samfélagsábyrgð og hlutverk ríkisins.

„Menn voru alls ekki óánægðir með að hún skildi ákveða að mæta á fundinn og tala um þessi mál. Hún þurfti að vísu að yfirgefa fundinn eftir að hún hafði tekið til máls og því sat aðstoðarmaður hennar fyrir svörum þegar orðið var laust.“

Ráðherra bar skylda til að mæta á fund ríkisstjórnar sem hófst strax eftir ræðu hennar og gat Ragnheiður því ekki setið fyrir svörum í gær.

Festa er miðstöð um samfélagsábyrgð fyrirtækja og eru 25 íslensk fyrirtæki félagar.

„Það skapaðist mjög fjölbreytt umræða eftir fundinn í gær og voru orkumál töluvert í umræðunni. Síðan kom til að mynda spurning úr sal um það hvernig yfirvöld geta verið ákveðin fyrirmynd þegar kemur að samfélagsábyrgð. Það komu fram margar frábærar hugmyndir um það hvernig ríkið getur hvatt fyrirtæki í því að vera ábyrgari.“

Samfélagsleg ábyrgð fyrirtækja er hugtak sem er nokkuð nýtt á nálinni hér á landi en hefur síðustu misseri fengið töluverðan meðbyr í íslensku samfélagi.

„Það hefur orðið nokkuð mikil vitundarvakning þegar kemur að samfélagsábyrgð en við Íslendingar eru samt sem áður komnir heldur stutt á veg, sérstaklega ef við berum okkur saman við hin norðurlöndin. Þar er slík ábyrgð orðin meiri hluti af daglegri starfsemi fyrirtækja. Það er samt gaman af því að íslensk fyrirtæki eru í auknu mæli að átta sig á því að neitendur eru að kalla eftir því að vörur og starfsemi komi til með ábyrgari hætti.“

„Það er greinilega aukinn áhugi hjá fyrirtækjum að gerast félagar hjá Festu. Í dag eru 25 fyrirtæki félagar að Festu sem eru bæði stór og smá. Sex fyrirtæki voru stofnendur árið 2011 og á þessu ári hafa bæst við ný fyrirtæki í hópinn.“