Sífellt hættulegri glæpamenn afplána í opnum fangelsum

Um 450 manns eru nú á boðunarlista hjá fangelsismálastofnun og bíða þess að afplána dóma sína.

Fangelsið á litla Hrauni er yfirfullt. Dæmi eru um að fangar sem alla jafna þyrftu að afplána í hámarks gæslu séu sendir í opin fangelsi til afplánunar.  

Með opnum fangelsum er meðal annars átt við Kvíabryggju og Sogn en þar eru samtals um 40 afplánunarrými.

í þessum fangelsum er lágmarks eftirlit er með föngum. Þar eru hvorki rimlar fyrir gluggum né heldur er svæðið öðru vísi afgirt en venjuleg sveitabýli. Hugmyndin var að þar væru vistaðir menn sem hafa lítinn sakaferil eða sem ætla má að sé treystandi til þess að afplána við slikar aðstæður.

Samkvæmt upplýsingum fréttastofu afplána þar nú alltaf tæpari og tæpari menn.

Ástandið á litla hrauni veldur mönnum einnig áhyggjum en í síðustu viku greindum við frá því að vaxandi fíkniefnaneysla væri innan veggja fangelsisins. Mikið er um smygl á læknalyfjum með gestum og eiga fangaverðir í stökustu vandræðum með eftirlit þar sem litlar heimildir eru fyrir því að leita á gestkomandi, nema að rökstuddur grunur sé um brot.