Fjölmiðlabraut Flensborgarskólans lokar: „Hörmuleg ákvörðun að þurfa að taka“

Upplýsinga- og fjölmiðlabraut Flensborgarskólans í Hafnarfirði verður lögð niður frá og með áramótum. Nemendum var tilkynnt um breytingarnar á fundi í gær og segir Magnús Þorkelsson skólastjóri að haustönnin verði kláruð, en síðan verði brautin lögð niður.

„Skólinn stendur afar illa fjárhagslega og það eru gerðar harðar kröfur um hagræðingu, segir Magnús í samtali við Vísi. Við höfum þurft að fara yfir allan rekstur skólans og þetta er ein af lausnunum sem við sjáum. Krafan er tvíþætt, annars vegar um niðurskurð og hagræðingu og hins vegar að finna stað til að gera breytingar sem færa ekki bara til kostnað yfir á aðra staði í húsinu. Þetta er leið til þess, þarna eru fáir nemendur og margir kennarar.“

Um þrjátíu nemendur eru á brautinni, sem fjórir starfsmenn hafa sinnt. Nokkrir nemendanna munu útskrifast í lok haustannar og mun breytingin ekki hafa áhrif á útskrift þeirra, en aðrir nemendur þurfa að skipta um skóla, vilji þeir halda náminu áfram.

„Verst staddi hópurinn er sá sem er kominn að því að fara í það sem kallað er fjölmiðlatækniþjálfun, sem er kannski kjarni starfsins í deildinni. Það er eiginlega erfiðast að bjarga þeim, en við erum búin að tala bæði við Tækniskólann og Borgarholtsskóla um að veita okkur aðstoð og þeir hafa lofað að veita okkur allt það liðsinni sem þeir geta veitt.“

Þessir fjórir starfsmenn, verða þeir færðir til eða munu þeir missa vinnuna?

„Þeir missa vinnuna. Sem er alveg hörmung því þetta er mikil þekking sem við erum að missa og gott starfsfólk. Þetta er hörmuleg ákvörðun að þurfa að taka en við eigum ekki margra kosta völ.“