ASÍ segir Samtök atvinnulífsins falsa söguna

„Samtök atvinnulífsins setja fram dæmalausa sögufölsun í nýjum sjónvarpsauglýsingum. Í þeim er með sérlega ósmekklegum hætti látið í það skína að kröfur launafólks um launahækkanir séu ástæða hárrar verðbólgu á Íslandi.“ Þetta kemur fram á vefsíðu ASÍ.

Þar segir að Samtök atvinnulífsins (SA) skauti algerlega framhjá þeirri augljósu staðreynd að hér á landi er í umferð veikur gjaldmiðill sem falli reglulega með braki og brestum. Svo ekki sé talað um hrun krónunnar fyrir fimm árum síðan.

Á vefsíðu ASÍ er því haldið fram að SA viti að endurteknar gengisfellingar hafi áhrif á afkomu launafólks sem þurfi að mæta þeim með hærri launakröfum. Ef starfsmenn SA hefðu nálgast málið af heiðarleika og reiknað inn í dæmið sveiflur gjaldmiðilsins sæju þeir að launahækkanir á Íslandi eru á pari við það sem gerist á Norðurlöndunum.

Samtök atvinnulífsins skauti algerlega framhjá þeirri augljósu staðreynd að hér á landi er í umferð veikur gjaldmiðill sem fellur reglulega með braki og brestum svo ekki sé talað um hrun krónunnar fyrir 5 árum. 

„Þá forðast Samtök atvinnulífsins að nefna þá staðreynd að laun sem hlutfall af landsframleiðslu eru umtalsver lægri hér en á hinum Norðurlöndunum,“ segir á síðunni.

„Þetta sérkennilega útspil SA er afar óheppilegt innlegg í þær kjaraviðræður sem nú eru nýlega hafnar og ekki líklegt til þess að byggja upp traust milli aðila. Falsanir og útúrsnúningar eru ekki heppilegt veganesti í þá vegferð sem framundan er.“

Á vefsíðu SA segir:  „Samtök atvinnulífsins vekja þessa dagana athygli á því að við höfum val um hvert leið okkar liggur eins og sjá má í meðfylgjandi myndskeiði,“ sem er hér að neðan.