,,Kreddukarlarnir lækka veiðigjaldið og gefa makrílkvótann''

„Við töpuðum meira fylgi en nokkur annar stjórnarflokkur í vestrænni stjórnmálasögu. Það var erfið og sár upplifun og ekkert sjálfgefið að Samfylkingin myndi lifa það mikla högg. En við höfum gert það og hafið uppbyggingu á ný,“ sagði Árni Páll Árnason, formaður Samfylkingarinnar, á opnum fundi flokksins í kvöld á Grand Hótel í kvöld.

Um hundrað manns voru viðstaddir fundinn og fékk formaðurinn góðar viðtökur þegar ræðu hans var lokið.

„Við lifum sérkennilega tíma, tíma langvinns umróts í eftirmála hruns. Við slíkar aðstæður er hægt að efla samstöðu eða næra ótta og óöryggi með því að draga víglínur og bjóða skjól gegn hættum sem leynast handan línunnar. Ríkisstjórnarflokkarnir hafa tekið síðari kostinn.“

Árni Páll talaði um að fyrsta verkefni ríkisstjórnarinnar hafi ekki verið að bæta kjör almennings, heldur samt þvert á móti að létta sköttum af útflutningsgreinum sem þó hafa notið fordæmalauss hagnaðar á undanförnum árum. Hann vildi meina að almenningur ætti enn að búa við stöðuga ógn gengisfellingar og verðbólgu.

„Við þurfum ekkert á því að halda að sundra fólki að óþörfu og búa til óvini á hverju götuhorni. Þvert á móti þarf að leiða öll sanngjörn öfl saman að skynsamlegri niðurstöðu. Við viljum öfluga velferð, byggða á efnahagslegum stöðugleika. Við vitum – eftir meira en hundrað ára baráttu – að félagslegt réttlæti verður bara fengið með aukinni verðmætasköpun og sanngjörnum leikreglum við skiptingu verðmætanna“.

Árni Páll vildi síðan meina að raunverulega hætta væri á því að skapast myndi það sem hann kallaði japanskt ástand og efnahagsleg lömun myndi blasa við. Nú þegar spáð er litlum hagvexti, lítilli fjárfestingu og ofskuldsetningu í atvinnulífi ætti svarið að vera að opna hagkerfið og auka samkeppni að mati formanns Samfylkingarinnar.

„Við ættum líka að leggja allt kapp á nýjan gjaldmiðil sem greiðir fyrir aukinni fjárfestingu. En kreddukarlarnir kjósa frekar að loka leiðinni út og hætta aðildarviðræðum við Evrópusambandið“.

„Við ættum að auka arð okkar af auðlindum til lands og sjávar. Nei, kreddukarlarnir lækka veiðigjaldið, gefa makrílkvótann og eiga þá einu uppbyggingarhugmynd að gefa orku til stóriðju“.

„Við ættum að styðja við atvinnusköpun með myndarlegri lækkun tryggingagjalds. Allar atvinnugreinar myndu njóta þess. Nei, kreddukarlarnir kjósa frekar að lækka skatta á best stæðu fyrirtækin í best stæðu atvinnugreinunum“.

Árni Páll vildi meina að það vantaði hjarta í stjórnarflokkana tvö. Þeir hefðu lagt áherslu á að lengja ekki fæðingarorlofið og draga úr þróunaraðstoð við fátækustu þjóðir heims. Einnig ætla ríkistjórnarflokkarnir að minnka rétt til atvinnuleysisbóta. Þessi stefna hugnaðist ekki formanninum.