Setti hné á vinstra gagnauga konunnar

Tvær konur sem áttu leið hjá þegar harkalega handtakan átti sér stað í júlí báru einnig vitni í aðalmeðferðinni sem nú fer fram við Héraðsdóm Reykjavíkur. Önnur kvenanna sagði að þegar þær hefðu komið að lögreglubílnum hafi þær séð konuna slegna niður í bekk. Konan hafi ekki streist á móti. Hún hafi verið dregin eftir jörðinni og henni fleygt inn í bíl og sá ákærði hafi sett hnéð á vinstra gagnauga konunnar.

„Þetta var ekki mjúkleg lending. Við vorum í algjöru sjokki. Konan var greinilega ofurölvi og í engu ástandi til að streitast á móti," sagði önnur kvenanna sem bar vitni.

Hitt vitnið bætti við að konan hafi ekki verið að gera neitt af sér. Hún hafi verið alveg dofin í hreyfingum og í engu standi til að streitast á móti. Hún hafi verið eins og dúkka sem var fleygt til og frá.