Heimilt að veiða síld innan brúar í Kolgrafafirði

Sigurður Ingi Jóhannsson sjávarútvegsráðherra segir að nú megi veiða síld innan brúar í Kolgrafafirði, og hefur þannig brugðist skjótt við fréttum Vísis og Bylgjunnar af mikilli síld í firðinum. Reglugerðin kveður á um að nú eru heimilar frjálsar veiðar smábáta innan við brú. Þetta eru viðbrögð stjórnvalda við því að Kolgrafafjörður er fullur af síld, og heimamenn óttast síldardauða eins og varð síðastliðinn vetur.

„Ég hef heimilað frjálsar veiðar fyrir innan brú. Það er auðvitað  gert í tvennum tilgangi: Bjarga verðmætum ef til þess kæmi að síldin drepist, en ekki auðvitað er ekki gott að meta það. En, þarna má nú stunda frjálsar veiðar. Og svo gæti þetta haft fælingarmátt; að síldin fari þá jafnvel þarna út,“ segir sjávarútvegsráðherra sem vill brýna fyrir sjómönnum sem færu til þessara veiða fari að öllu með gát, til dæmis þegar farið er undir brú og inn í fjörðinn.

Leyfið tekur gildi frá og með deginum í dag. „Við erum búin að gefa út reglugerð til þess að koma þessu strax af stað. Erfitt er um að spá hvort komi til umhverfisslyss en þess vegna grípum við til þessara ráða. Jafnframt er ég í sambandi við innanríkisráðuneytið um að ef til þess kæmi að síld fari að drepast þarna þá verði vegur rofinn til að koma á hringrás.“

Snögglega er því brugðist við fréttum um síldargengd í Kolgrafafirði sem er fullur af síld fyrir innan brú þriðja árið í röð en sjómenn á minni bátum höfðu ekki heimild til að veiða hana. Pálmi Stefánsson skipstjóri á Kidda RE sem er átta tonna trilla, fór inn fyrir brú á bát sínum fyrr í dag og sá þá miklar síldartorfur þar.

Í Kolgrafarfirði hafa í heildina drepist rúmlega 50.000 tonn; niðurstöður mælinga Hafrannsóknastofnunar benda til þess að um 22.000 tonn af síld hafi drepist í Kolgrafafirði föstudaginn 1. febrúar. Það kom til viðbótar þeim 30.000 tonnum sem drápust í firðinum í desember 2012.