Oddviti Sjálfstæðismanna boðar skattalækkanir í Reykjavík

Nýr oddviti Sjálfstæðismanna í Reykjavík vill fækka starfsmönnum borgarinnar með því að ráða ekki í nýjar stöður á vissum sviðum og segir svigrúm geta skapast til skattalækkunar í Reykjavík. Oddviti Samfylkingarinnar segir þetta fráleita leið.

Halldór Halldórsson nýr oddviti Sjálfstæðismanna í Reykjavík segir að borgin geti nýtt sér stærðarhagkvæmni og starfsmannaveltu til að fækka starfsfólki og þar með lækkað álögur á borgarbúa. Formaður borgarraðs segir útsvar og fasteignagjöld hafa verið í hámarki þegar Halldór hætti sem bæjarstjóri á Ísafirði.

„Þannig að mér finnst það ekki alveg trúverðugt að koma hér einhvern veginn á hvítum hesti og segja við starfsfólk borgarinnar sem búið er að skera niður ár eftir ár, búið að sýna mikið aðhald og standa með okkur og segja þá: Nú er einfalt að fara í skattalækkanir,“ segir Dagur.

Halldór segir þetta ekki sanngjarnan samanburð þar sem fasteignaverð sé mun lægra fyrri vestan og bærinn misst frá sér fólk á undanförnum árum.

„Ef það tekst jafnvel til hjá borginni og landsmeðaltalið sýnir fram á á þessu kjörtímabili, ætti að skapast möguleiki á að lækka útsvarið,“ segir Halldór og þá strax á næsta kjörtímabili. „Þetta stóra sveitarfélag ætti að geta gert það,“ bætir hann við.

Dagur mælist með mest fylgi í embætti borgarstjóra í könnun Félagsvísindastofnunar fyrir Morgunblaðið í dag, með 33 prósent, en Halldór 11,7 prósent. En hafa þeir þá stjörnueiginleika sem Jón Gnarr hefur svo mikið af og virðist þurfa til að ná hylli kjósenda?

„Ég fékk nú að spreyta mig í 100 daga. Ég held að það hlutfall Reykvíkinga sem var ánægt með það hafi tvöfaldast á þeim stutta tíma og verið komið vel yfir 50 prósent. Þannig að ég kvíði því ekki,“ segir Dagur.

„Ég tel að þeir sem bjóða sig fram og verða oddvitar sinna lista séu í rauninni þar með búnir að sanna að þeir hafa ákveðna eiginleika sem eiga að nýtast vel í þessu starfi. Ég var fleiri en 100 daga í starfi framkvæmdastjóra sveitarfélags, ég var í 12 ár þannig að ég hef reynslu,“ segir Halldór.

Horfa má á viðtalið við Halldór og Dag í heild sinni í þættinum Pólitíkin á Vísi.